மலேசியாவின் பெனாங்கல் பேய்: மர்மமான கதையின் பின்னணி என்ன?

நள்ளிரவு நேரம். மலேசியாவின் அமைதியான கிராமம் ஒன்றில், ஒரு பழைய வீட்டிற்குள் பிரசவ வலியால் ஒரு பெண் துடித்துக்கொண்டிருக்கிறாள். வீட்டிற்கு வெளியே குடும்பத்தினர் பதற்றத்துடன் காத்திருக்கிறார்கள். திடீரென்று, அந்த வீட்டின் கூரைக்கு மேலே ஏதோ ஒன்று சிறகடித்துப் பறக்கும் சத்தம் கேட்கிறது. முதலில் அது ஒரு பறவை என்று நினைத்தாலும், ஜன்னல் வழியாக வெளியே பார்த்த ஒருவரின் கண்களுக்குத் தெரிந்த காட்சி ஒட்டுமொத்த உடம்பையும் நடுங்க வைக்கிறது. அங்கே ஒரு பெண்ணின் தலை மட்டும் மிதந்து வருகிறது. அந்தத் தலைக்குக் கீழே நீளமாகத் தொங்கும் குடல்களும், உடம்பே இல்லாத அந்தத் துண்டிக்கப்பட்ட உருவமும் மெதுவாக அந்த வீட்டிற்குள் நுழைய முற்படுகிறது. இது வெறும் திகில் சினிமா காட்சி அல்ல. பல தலைமுறைகளாக மலாய் மக்களிடையே பேசப்பட்டு வரும் ஒரு பயங்கரமான நாட்டுப்புற நம்பிக்கை.

பெனாங்கல் என்றால் என்ன?

மலேசிய நாட்டுப்புற கதைகளில் 'பெனாங்கல்' என்பது மிகவும் பிரபலமான மற்றும் அதே சமயம் பயங்கரமான ஒரு அமானுஷ்ய உயிரினமாகும். பகல் நேரங்களில் இது மற்ற மனிதர்களைப் போலவே ஒரு சாதாரணப் பெண்ணாக வாழ்வதாகக் கருதப்படுகிறது. ஆனால் இருள் சூழ்ந்ததும், அவளுடைய தலை கழுத்தோட சேர்ந்து உடலை விட்டுப் பிரிந்து தானாகவே பறக்கத் தொடங்குமாம்.

இந்தத் தலை தனியாகப் பறக்கும்போது, அதன் கீழ் பகுதியில் நுரையீரல், வயிறு மற்றும் குடல்கள் போன்ற உள்ளுறுப்புகள் வெளியே தொங்கிக்கொண்டிருக்குமாம். பார்ப்பதற்கு ஏதோ உயிருள்ள உடலின் ஒரு பகுதி துண்டிக்கப்பட்டு காற்றில் மிதந்து வருவது போல இருக்கும். இந்த உருவத்தின் முக்கிய நோக்கமே இரவு நேரங்களில் தங்களுக்குத் தேவையான இறையைத் தேடுவதுதான். இதனைப் பற்றி முழுமையாகப் புரிந்துகொள்ள, மலேசியாவின் கலாச்சாரத்தில் ஊறிப்போயுள்ள இந்த நம்பிக்கையின் ஆழத்திற்குள் செல்ல வேண்டும்.

பெனாங்கல் உருவானதற்கான பின்னணிக் கதைகள்

ஒரு சாதாரணப் பெண் எப்படி இப்படி ஒரு பயங்கரமான உருவமாக மாற முடியும் என்ற கேள்விக்கு, மலாய் மரபுக் கதைகளில் பல விளக்கங்கள் உள்ளன. இதில் முதன்மையானது கருப்பு மந்திரம் அல்லது அமானுஷ்ய சக்திகளுடன் தொடர்புடையது.

• தீய சக்தியுடனான ஒப்பந்தம்: ஒரு பழைய கதையின்படி, ஒரு பெண் பேராசையின் காரணமாக அமானுஷ்ய சக்தியைப் பெற ஒரு தீய சக்தியுடன் ஒப்பந்தம் செய்துகொள்கிறாள். அதன் விளைவாக, இரவு நேரத்தில் தனது உடலிலிருந்து தலையைப் பிரித்து பறக்கும் சக்தியைப் பெறுகிறாள். அந்த நேரத்தில் அவளது உடல் வீட்டில் கிடக்கும்.
• வினிகர் சடங்கு: மற்றொரு பதிப்பின்படி, ஒரு பெண் வினிகர் நிரப்பப்பட்ட பெரிய பாத்திரத்தில் உட்கார்ந்து ஏதோ ஒரு ரகசிய சடங்கு செய்துகொண்டிருந்தாள். அப்போது திடீரென பயந்து எழுந்ததால், அவளுடைய தலை உடலில் இருந்து பிரிந்துவிட்டது. உடல் சுருங்குவதற்காகவே அவள் வினிகரைப் பயன்படுத்தியதாக நம்பப்படுகிறது. இதனால்தான் பெனாங்கல் நடமாடும் இடங்களில் வினிகர் வாசனை வீசும் என்று மக்கள் நம்பினார்கள்.

அந்த ஒப்பந்தத்துக்கு பிறகு அவளுக்கு இரவு நேரத்தில தன்னோட தலையை உடம்பில இருந்து பிரிச்சுகிட்டு பறக்கிற சக்தி கிடைச்சதாம். அவளோட உடம்பு மட்டும் அவள் வீட்டிலேயே கிடக்குமாம்.

ஏன் பிரசவ வீடுகளை குறிவைக்கிறது?

பெனாங்கல் பற்றிய கதைகளில், அவை குறிப்பாகப் பிரசவ காலத்தில் இருக்கும் பெண்களையும், புதிதாகப் பிறந்த குழந்தைகளையும் குறிவைப்பதாகக் கூறப்படும். இதற்குப் பின்னால் ஒரு முக்கியமான வரலாற்று மற்றும் சமூக சூழல் ஒளிந்திருக்கிறது. அக்காலகட்டத்தில் நவீன மருத்துவ வசதிகள் இல்லாத கிராமப்புறங்களில், பிரசவம் என்பது ஒரு குடும்பத்தின் மிகவும் பதற்றமான தருணமாக இருந்தது.

தாய் மற்றும் குழந்தை உயிர் பிழைப்பார்களா என்ற பயம் அந்த மக்களிடையே இருந்தது. அந்த அச்சமும், இரவு நேரங்களில் ஜன்னல் வழியே தெரியும் விசித்திரமான நிழல்களும் ஒன்றாகச் சேர்ந்து பெனாங்கல் என்ற உருவகத்தை உருவாக்கியிருக்கலாம். பிரசவத்தின் போது பலவீனமாக இருக்கும் பெண்களை இந்த உயிரினம் தாக்கும் என்ற நம்பிக்கை, கிராமத்து மக்களை மிகுந்த எச்சரிக்கையுடன் இருக்க வைத்தது.

கிராமத்து பாதுகாப்பு வழிமுறைகள்

இந்த அமானுஷ்ய உயிரினத்திடமிருந்து தங்களைப் பாதுகாத்துக்கொள்ள அந்த காலத்து மக்கள் சில விசித்திரமான முறைகளைப் பின்பற்றினார்கள். பெனாங்கல் ஒரு பெண்ணின் உடலைத் தேடி மீண்டும் திரும்பும் போது, அதன் குடல்கள் ஏதேனும் ஒன்றில் சிக்கிக்கொண்டால் அதனால் பறக்க முடியாது என்பது நம்பிக்கை.

இதற்காக மக்கள் ஜன்னல்கள் மற்றும் கதவுகளின் ஓரங்களில் முட்கள் நிறைந்த செடிகளை நட்டு வைத்தார்கள். பறந்து வரும் பெனாங்கலின் உள்ளுறுப்புகள் அந்த முட்களில் சிக்கிக்கொண்டால், அது மீண்டும் தன் உடலுக்குத் திரும்ப முடியாமல் போய்விடும் என்பது மக்களின் நம்பிக்கையாக இருந்தது. இது ஒரு வகையில் தற்காப்பு நடவடிக்கையாகத் தோன்றினாலும், அந்த காலத்தில் நிலவிய பயத்தின் ஆழத்தை இது காட்டுகிறது.